NINAVYOMFAHAMU JANETH MAGUFULI

Baada ya jina la Waziri wa Ujenzi, Dk. John Magufuli, kuteuliwa na Chama Cha Mpinduzi (CCM) kuwa mgombea wa Urais katika uchaguzi wa Oktoba, imebainika mke wake Janeth Magufuli, alikuwa hapendi kuitwa mke wa waziri.

Janeth anafundisha katika Shule ya Msingi Mbuyuni, Oysterbay jijini Dar es Salaam, ambayo pia ndiyo iliyomuibua  Salma ambaye ni mke wa Rais Jakaya Kikwete.

Mwalimu Mkuu wa Shule hiyo, Doroth Malecela, katika mahojiano maalumu na NIPASHE, alisema Janeth anayefahamika kwa jina la ‘Mwalimu Pombe’, amekuwa na maisha ya kipekee kutokana na kutopenda nafasi ya mumewe kuwa kitambulisho chake na alijaribu kuishi katika mazingira ya hali ya chini kiasi ambacho hakuweza kutambulika kirahisi kama ni mke wa Waziri Magufuli.

MAISHA SHULENI

Akiwa shuleni hapo Mwalimu Janeth alifundisha darasa la tano na masomo aliyomudu vizuri ni Historia, Uraia,Tehama na Haiba ya Michezo.

Malecela alisema kwa ujumla alikuwa akitekeleza wajibu wake bila kusukumwa, alikuwa mpole, mkarimu na alionyesha  ana wito na taaluma yake.

“Ninaweza kusema ni mwanamke tofauti, alijituma sana na kila siku alikuwa akiwahi shuleni na kusimamia usafi wa mazingira, kwa mtu kama yeye ni vigumu kufanya vitu hivyo,” alisema mwalimu Malecela.

MKE WA WAZIRI

Mwalimu Malecela alisema katika muda wote wakifanya kazi pamoja walikuwa wakiepuka kumuita kwa jina la mke wa waziri kutokana na kutopenda kuitwa hivyo. 

“Ukimuita mke wa waziri alionekana kuchukia na kweli mtagombana, alitaka aitwe mama Pombe Magufuli, wanafunzi wake alitaka wasijue yeye ni nani ili aonekane mtu wa hali ya chini kama walivyo wengine,” alisema Malecela.

Aliongeza: “Unajua mama Pombe muda wote alikuwa anakaa na wanafunzi akizungumza nao, hivyo hakutaka kujikweza ili kuharibu uhusiano wake na wanafunzi.”

Alisema jambo lingine linalovutia kwa mama Janeth, ni tabia yake ya kupenda kula pamoja na wanafunzi wake chini ya mti ulio jirani na darasa lake kila siku mchana.

“Shule yetu ina mfumo wa kupika chakula cha wanafunzi, yeye alipenda kula chakula aina ya kande akiwa na wanafunzi wake,” aliongeza mwalimu mkuu huyo.

Alisema kwa kuonyesha ni jinsi gani hataki maisha ya juu, watoto wake wote walipitia shuleni hapo na mtoto wa mwisho alimaliza mwaka juzi na kufaulu Shule ya Sekondari ya Kata ya Oysterbay ambako anaendelea kusoma.

NI MAHIRI KUIMBA

Kitu kingine ambacho kimetajwa kuwa cha kipekee kwa mama Pombe ni kuwa na uwezo mkubwa wa kutunga, kughani mashahiri.

Kutokana na kipaji hicho shule hiyo ilikuwa ikimtegemea katika kutunga mashairi na wakati mwingine kughani katika shughuli mbalimbali.

Hata hivyo, mwalimu Janeth ni mahiri wa kutengeneza zana mbalimbali za kufundishia na kujifunzia.

WALIVYOPOKEA UTEUZI

Mwalimu wa taaluma wa shule hiyo, Joseph Jonas maarufu kama ‘JJ’ alisema mara waliposikia Waziri Magufuli ameteuliwa kuwa mgombea urais, walifurahi baada ya kujiona wana bahati kwa shule yao kutoa mke wa Rais wa Awamu ya Nne na sasa mke wa rais mtarajiwa.

Mke wa Rais Jakaya Kikwete, mama Salma Kikwete kabla ya kuwa katika nafasi ya 'First Lady' mwaka 2005, alikuwa akifundisha shule hiyo.

“Tulikuwa na furaha na baada ya jina la Magufuli kutajwa kuwa mshindi, walimu na wazazi tulipigiana simu kujipongeza,” alisema mwalimu JJ.

Mwanafunzi aliyekuwa akimfundisha, Jane Andrew (12), alisema umefurahishwa na uteuzi huo, lakini wameumia kuondokewa na mwalimu mwenye uwezo wa ufundishaji.

Alisema watamkumbuka Mwalimu Janeth kama mama yao kutokana na tabia yake ya kufundisha kwa kuelekeza bila kutumia fimbo.

Frank Peter (11) kwa upande wake alisema atamkumbuka katika somo lake la michezo kwani amekuwa akifundisha huku mwenyewe akishiriki kucheza.

“Hakuna mwanafunzi atakayejitokeza na kusema alikuwa haeleweki alipotufundisha, masomo yake tulikuwa na alama nzuri kwenye mitihani ya kawaida na kitaifa,” alisema Peter. 

CHANZO: NIPASHE