MAJAMBAZI WAVAMIA NA KUPORA MAMILIONI YA FEDHA

Na Steven Augustino wa demasho.com, Tunduru

WATU wanaodhaniwa kuwa ni majambazi, wamevamia ofisi za wanunuzi wa madini ya vito ya RUBY and SAPPHIRE kutoka Srilanka, na kuwashambulia walinzi na wamiliki wa ofisi hizo kwa kutumia silaha za jadi, na kufanikiwa kuiba kiasi cha Shilingi Milioni 10 na kisha kutoweka kusikofahamika.

 Taarifa za tukio hilo zinaelezea kuwa sambamba na kiasi hicho cha pesa, maharamia hao walifanikiwa kuiba vifaa vya mawasiliano (IPAD) 3, zenye thamani ya Dola za Kimarekani 240, sawa na Shilngi 384,000 za kitanzania.

Kamanda wa Polisi wa Mkoa wa Ruvuma Bw. Mihayok Msikhela, amesema kuwa katika tukio hilo, majambazi hao waliwajeruhi watu watatu akiwemo mlinzi, aliyefahamika kwa jina la Rashid Ally (70) ambaye baadaye alifariki dunia wakati akipatiwa matibabu katika hospitali ya Serikali ya Wilaya ya Tunduru.

Kamanda Msikhela, aliwataja majeruhi ambao walipigwa na kuwakata na vitu vianvyodhaniwa kuwa ni nondo na mapanga kuwa ni, wafanyabishara wa kampuni hiyo ya ununuzi wa madini raia wa Srilanka, Bw. Mohammed Fathik na Bw. Abudul Ifham, ambao baada ya tukio hilo wameondoka kurejea nchini kwao kwa ajili ya matibabu.

Alisema taarifa zinaeleza kuwa, mlinzi aliyekumbwa na mkasa huo marehemu Rashidi Ali, alikuwa amemsaidia kazi hiyo ya kulinda mjomba wake, Bwana Musa Adamu, ambaye alikuwa yupo katika mapumziko ya siku mbli baada ya kuoa, katika ndoa iliyofanyika Agosti 31 mwaka huu.

Kamanda Msikhela aliendelea kufafanua kuwa, kufuatia hali hiyo Polisi wilayani Tunduru wanaendelea kukisaka kikundi cha maharamia hao, ili sheria iweze kufuata mkondo wake.

 Wakizungumzia tukio hilo kaimu wa kaimu Mganga Mfawidhi wa hospitali ya serikali ya wilaya ya Tunduru Dkt. Zabron Mmary na Muuguzi wa Zamu katika wodi namba moja, Bw. Koletah Mnunduma Mtutura, walikiri kumpokea majeruhi huyo majira ya saa 10.30 za usiku wa kuamkia September 2 mwaka huu na kwamba marehemu aliletwa Hospitalini hapo akiwa hajitambui, huku akiwa anatokwa na damu nyingi masikioni, puani na mdomoni.

Walisema hata hivyo mzee huyo, alifariki dunia wakati juhudi za maafisa tabibu kuokoa maisha yake zikiendelea.

   

Mganga aliyeufamyia uchunguzi mwili wa marehemu  Rashidi Ali, Dkt. Joseph Komba, alisema kuwa chanzo cha kifo cha marehemu kimetokana na kutokwa na damu nyingi baada ya kupasuka fuvu la kichwa, hali iliyosababisha damu kuchanganyika na ubongo.

CHANZO. DEMASHO BLOG