FUVU LA MTU LAKUTWA CHANIKA

WATU watatu wameripotiwa kufariki dunia jijini Dar es Salaam juzi katika matukio tofauti akiwamo mmoja aliyekutwa fuvu la kichwa pekee.

Kamanda wa Polisi Mkoa wa Ilala, Marietha Minangi, alisema kati ya matukio hayo, juzi, saa 6 mchana, maeneo ya Lubakaya –Chanika, lilikutwa fuvu la kichwa.

Minangi alisema chanzo cha kifo hakijafahamika, kwani ulifanywa utaratibu wa kumuita daktari wa Hospitali ya Amana kufanya uchunguzi, lakini ilishindikana kutokana fuvu hilo kuharibika.

Katika tukio jingine, maiti ya mtoto Rajabu Ally (9), mkazi wa Chanika Vikongoro, imekutwa ikielea ndani ya bwawa la maji.

Maiti hiyo iliyokutwa juzi, saa 4 asubuhi maeneo ya Lubakaya, imehifadhiwa Hospitali ya Taifa Muhimbili.

Wakati huohuo, mwanafunzi wa Shule ya Msingi Mabatini, Jackson Malinzi (7), mkazi wa Maguruwe, amefariki dunia baada ya kugongwa na gari.

Kamanda wa Polisi Mkoa wa Temeke, Englibert Kiondo, alisema ajali hiyo iliyohusisha gari T 618 APJ Toyota Hiace ilitokea juzi, saa moja asubuhi wakati mwanafunzi huyo  alipokuwa akivuka barabara. Maiti imehifadhiwa Hospitali ya Temeke