P-SQUARE KUTUMBUIZA DAR NOV.23

Wasanii mapacha kutoka nchini Nigeria, Peter na Paul Okoye maarufu P-Square, wanatarajiwa kufanya onyesho moja nchini Novemba 23 mwaka huu katika viwanja vya Leaders jijini Dar es Salaam chini ya udhamini wa Vodacom Tanzania

Akizungumza na waandishi wa habari jana, msemaji wa waandaaji wa onyesho hilo, Hillary Daud ‘Zembwela’ wa EATV na EA Radio, alisema wasanii hao ambao wanatamba na kibao ‘Personally’, wataongozana na wasanii wengine 13 kwa ajili ya onyesho hilo.

“Onyesho hilo walitalifanya ‘live’ jukwaani siku hiyo, huku wasanii watakaoongozana nao wakifanya hivyo…lakini watakuwapo wasanii wa hapa nyumbani watakaojumuika na mapacha hao na watafahamika baadaye,” Zembwela.

Zembwela alisema onyesho hilo ambalo limedhaminiwa na kampuni ya huduma za simu ya Vodacom na kwamba mashabiki watarajie kupata burudani tosha huku fursa pekee ikiwa kwa wasanii wa hapa nyumbani kujifunza kutoka kwa vijana hao wanaotambulika pia Ulaya na Marekani.

Alisema wasanii wanatakiwa kujifunza mengi kutoka kwa wasanii wanaokubalika kimataifa, hivyo kuja kwa mapacha hao pamoja na wale watakaowasindikiza kutasaidia kujifunza mengi.