MISWAADA YA MAFUTA NA GESI,YAHITAJI WABUNGE WASIOWAZIA UCHAGUZI

Kuna taarifa kuwa baadhi ya wadau wa mafuta na gesi wakiwamo wabunge wa Jamhuri ya Muungano wa Tanzania wanapinga kupitishwa bungeni kwa muswada wa sheria ya mapato yatokanayo na gesi na pia muswada wa sheria ya Petroli 2015.

Wadau hao walisema kwa hali ilivyo sasa, na kwa kuzingatia unyeti wa miswada yenyewe, hawaoni sababu ya kuwa na haraka ya kupitisha miswada hiyo katika Bunge la 10, mkutano wa 20 unaoendelea mjini Dodoma. Hoja yao kuu ni kutaka miswada hiyo isubiri serikali ijayo ili ipate nafasi ya kuchambuliwa kwa kina na kufanyiwa marekebisho kwa umakini ili mwishowe iwe na maslahi mapana kwa taifa.

Wadau hao wa mafuta na gesi walitoa msimamo huo mjini Dodoma juzi katika mkutano uliohusisha pia Kamati ya Kudumu ya Nishati na Madini, Kamati ya Kudumu ya Uchumi, Viwanda na Biashara na Kamati ya Bajeti. 

Wakati wakichangia, baadhi ya wadau akiwamo Mbunge wa Igunga na aliyewahi kuwa Kamishna wa Madini nchini, Dalali Kafumu, alisema kuna kasoro kadhaa katika miswada hiyo na hivyo haipaswi kupelekwa haraka. Alitaja baadhi ya kasoro hizo kuwa ni muswada huo kunakili karibu kila kitu kutoka katika muswada kama huo nchini Uganda ikiwamo tafsiri ya baadhi ya maneno isiyoeleweka vyema.

Siyo nia yetu kutaka kujadili yaliyomo ndani ya miswada hiyo. Hata hivyo, sisi tunaona kwamba ni kweli, kuna kila sababu ya kuruhusu mijadala ya kina miongoni mwa wadau kabla ya kufikia hatua ya kuifikisha bungeni. 

Tunashauri jambo hili huku tukijua kwamba sheria zinazotumika sasa ni za miaka ya 1980 na 2008, ambazo kwakweli bado zina maeneo kadhaa yasiyotoa suluhu ya moja kwa moja kwa changamoto mbalimbali zitokanazo na mabadiliko makubwa ya sayansi na teknolojia na pia mifumo ya kiuchumi duniani kote. 

Hata hivyo, pamoja na yote hayo, sisi tunadhani kwamba ni vizuri dhamira yoyote nzuri kuhusiana na namna bora ya kusimamia rasilimali za mafuta na gesi isiruhusu kuwapo kwa maamuzi ya pupa. 

Ikumbukwe kuwa tunakoelekea, taifa letu litakuwa likitegemea uchumi wake kukua kwa kasi kubwa zaidi kupitia sekta ya gesi na mafuta. Tafiti katika maeneo mbalimbali nchini zimethibitisha kuwa hadi kufikia sasa, taifa lina rasilimali ya gesi asilia ya futi za ujazo zaidi ya trilioni 50.    

Zipo pia tafiti nyingine nyingi zinazotoa matumaini ya kupatikana kwa kiwango kingine kikubwa zaidi cha rasilimali ya gesi na mafuta. Kwa sababu hiyo, sekta hii inatarajiwa kuwa mhimili mkuu wa kiuchumi. Itaingiza mapato ya moja kwa moja kupitia kodi, mauzo ya gesi na mafuta ughaibuni, kutoa ajira, kuwezesha ustawi wa viwanda nchini na pia kufanikisha uzalishaji wa mbolea utakaoongeza uzalishaji wa chakula. Hakika, zipo faida nyingi zitokanazo na gesi na mafuta na hivyo, hakuna ubishi kuwa hii ni sekta muhimu na nyeti kwa maslahi ya taifa ambalo kufikia mwaka 2025 linatarajiwa kuwa la uchumi wa kati.

Kwa kuzingatia yote hayo, sisi tunaona kwamba ni kweli, kuna kila sababu ya kujipa muda wa kutosha katika kujadili masuala ya gesi na mafuta. 

Aidha, kuna ukweli kuwa wabunge wengi hivi sasa hawana utulivu wa kutosha kiasi cha kuweza kujadili kwa kina miswada hii. Na hili liko wazi. Kwamba huu ni mkutano wa mwisho kwao na hivyo kifikra, wengi wao hawako bungeni hata kama wanaonekana kimwili. Wengi wanawazia hatma yao katika uchaguzi. Na wengi wao hawaonekani bungeni Dodoma kwa sababu wangali wakiweka mambo yao sawa kwa ajili ya uchaguzi mkuu utakaofanyika Oktoba. Ushahidi ni kuwapo kwa mahudhurio ya chini mno katika baadhi ya vikao, kimojawapo kikiwa ni kile kilichokuwa na wabunge 68 tu kupitisha makadirio ya mapato na matumizi ya Wizara ya Kilimo kwa mwaka wa fedha 2015/2016, badala ya zaidi ya 300.

Katika mazingira kama hayo, hatuoni uwezekano wowote wa kuwa na wabunge wenye kujadili mambo kwa kina kama tuliowazoea. Ni kwa sababu hawana utulivu.

Ni katika mazingira kama haya, ndipo nasi tunapoona kuwa miswada hii inayohusu gesi na petroli haipaswi kupelekwa bungeni wakati huu. Tuzingatie.

NIPASHE.