MWIMBAJI WA INJILI KEKELETSO PHOOFOLO, KUWASHA MOTO TAMASHA LA PASAKA LEO

MWIMBAJI wa Injili kutoka Afrika Kusini Kekeletso Phoofolo ‘Keke,’ amewasili jana tayari kwa tamasha la Pasaka linalotarajiwa kutimua vumbi leo katika Uwanja wa Taifa jijini Dar es Salaam.

Akizungumza mara tu baada ya kuwasili jana katika Uwanja wa Ndege wa Kimataifa wa Mwalimu Nyerere jijini Dar es Salaam, Keke alisema wadau mbalimbali watakaojitokeza leo katika tamasha hilo watarajie kupata burudani ya uhakika.

Keke alisema anafarijika kuitwa katika tamasha hili na amejipanga kuhakikisha anawapa raha Watanzania ambao watakuja Uwanja wa Taifa hii leo, kwani amejipanga kutoa burudani lukuki.

“Mimi nimekuja Tanzania kuhakikisha nawapa burudani wadau mtakaojitokeza kesho, hivyo basi hautakiwi kukosa kwani nimekuja na mambo mengi ya kuwapa,” alisema Keke.

Naye Mkurugenzi wa Msama Promotions, Alex Msama, amewataka wapenzi na mashabiki wa muziki wa Injili kujitokeza kwa wingi leo katika tamasha hilo la kihistoria ambalo hufanyika kila mwaka.

“Kusema kweli, mwaka huu tumejipanga zaidi ya mwaka jana, hivyo  tunawaomba watu wote wajitokeze kwa wingi katika Uwanja wa Taifa, tumewaletea vitu vizuri zaidi na cha muhimu ni wao kuja kujionea wenyewe,” alisema Msama.