Auawa akikwangua vocha

Kamanda wa Polisi Pwani, Boniventura Mushongi alithibitisha kutokea mauaji hayo na wanawasaka majambazi hao.

Kibaha. Mkazi wa Mtaa wa Karabaka Kata ya Misugusugu wilayani hapa Mkoa wa Pwani, Zawadi Khalfani (21) amekufa papo hapo baada ya kupigwa risasi begani na watu wanaodhaniwa majambazi, alipokuwa dukani akiingiza vocha kwenye simu.

Tukio hilo lilitokea Jumanne wiki hii saa mbili usiku, baada ya majambazi hayo kuvamia dukani hapo.

Zawadi, imekumbwa na mkasa huo wakati akiwa amebeba mtoto wake mdogo mgongoni .

Mwenyekiti wa Mtaa huo, Iddi Msangazi amesema Zawadi akiwa dukani hapo alipigwa risasi na mmoja wa majambazi hao aliyekuwa na bunduki baada ya kuvamia duka hilo na mengine yanayotoa huduma za kutoa na kutuma fedha kwa simu.

“Ni kama saa mbili hivi usiku kila mtu akiwa anaendelea na shughuli zake, bila kujua katika duka la Mhungaji Rafael kuna majambazi, sasa kumbe yeye aliwaona akafunga haraka duka lake na kutimua mbio ndipo walipojaribu kumrushia risasi ambayo ilimkosa na kumlenga mama huyo akiwa anaweka vocha kwenye simu yake,” alisema Msangazi

Amesema majambazi hao wawili, mmoja akiwa ameshika bunduki na mwingine panga baada ya kushindwa kufanikisha malengo yao katika duka la M-pesa, walivamia duka jingine la dawa na kupora simu mbili za mkononi na Sh500,000 kisha kutokomea kusikojulikana kwa kutumia pikipiki.

Shemeji wa marehemu huyo, God Matembele ambaye pia ni mjumbe wa kamati ya ulinzi na usalama ya mtaa huo, amesema akiwa nyumbani kwake alisikia mlio wa risasi na alipofika eneo la tukio alikuta shemeji yake ameuawa huku mwili wake ukiwa unavuja damu nyingi.

Amesema mwili huo ambao umehifadhiwa Hosptali ya Tumbi unatarajiwa kuzikwa makaburi ya Vigwaza wilayani Chalinze baada ya taratibu kukamilika.

Kamanda wa Polisi Pwani, Boniventura Mushongi alithibitisha kutokea mauaji hayo na wanawasaka majambazi hao.