MAPENZI YENYE KUWADI KWA VIPI YAWE YA MOYO?

Mapenzi yenye kuwadi, kwa vipi yawe ya moyo?

1.
Ndugu nipeni kilinge, ninalo la kuwaliza,
Lazima sasa niringe, kwalo ninalouliza,
wambea nao wachonge, beti zote kumaliza
Mapenzi yenye kuwadi, kwa vipi yawe ya moyo?

2.

Ni wazi yanapoanza, shurti wawili kughani,
Wa kwanza akiwa mwanza, mwenziwe akiwa pwani,
mapenzi hayataanza, hadi wawe kizioni,
Mapenzi yenye kuwadi, kwa vipi yawe ya moyo?

3.
Zamani mi nilidhani, mapenzi ni kitandani,
Kumbe sikuwa makini, mapenzi kuyabaini,
Sasa nimeamini, yaweza kuwa penuni,
Mapenzi yenye kuwadi, kwa vipi yawe ya moyo?

4.
Kama hawa wawili, bado kutana bayana,
Nini kitawabadili, kama mmoja atakana,
Kwamba hakumdahili, mwenzie bali hiyana,
Mapenzi yenye kuwadi, kwa vipi yawe ya moyo?

5.
Na hisia zi wapi, pale penye kuwadi,
Kitanda kina makapi, raha nayo si zaidi,
Hata itafunwe pipi, jivu halina uudi
Mapenzi yenye kuwadi, kwa vipi yawe ya moyo?

6.
penzi lisilo la ndani, baya kuliko kuzini
Maungo yahisi nini, moyo u-kizuizini,
Akili iko mtegoni, hisi zi mtandaoni,
Mapenzi yenye kuwadi, kwa vipi yawe ya moyo?

7.
Wa-tatu awapo kati, hapo hapakosi shaka,
Hata uwe mkakati, mapenzi hutayataka,
Tena yaliyo thabiti, si yale yenye mashaka,
Mapenzi yenye kuwadi, kwa vipi yawe ya moyo?

8.
Najua nimekukwaza, wewe uliye kuwadi,
Sifazo nimeziviza, sasa wataka kunadi,
Hata bila ya viza, nchi ukaifaidi,
Mapenzi yenye kuwadi, kwa vipi yawe ya moyo?

9.
Uzalendo u wapi, enyi wenye makuwadi,
Nchi mwaipelekapi, huku mwadai waridi,
Sie tulitoe wapi, kila kitu mmenadi,
Mapenzi yenye kuwadi, kwa vipi yawe ya moyo?

10.
Mwasema hamrejei, mwataka heshima mbele,
Heri tuikose bei, nyie muishi milele,
Mwisho tutoke nishai, kama sie misukule,
Mapenzi yenye kuwadi, kwa vipi yawe ya moyo?

CHANZO: Jamiiforums