UVCCM YAWAITA VIJANA KWENYE KAMPENI ZA MAGUFULI

Na Mwandishi Wetu, Dar es Salaam

KAIMU Katibu Mkuu wa Umoja wa Vijana wa Chama cha Mapinduzi Taifa (UVCCM), Shaka Hamdu Shaka, amewataka vijana kujitokeza kwa wingi katika uzinduzi wa kampeni za chama hicho zitakazofanyika Jumapili katika viwanja wa Jangwani.

Akizungumza na waandishi wa habari leo, Shaka aliwataka vijana wajitokeze kwa wingi bila kujali itikadi zao za vyama vya siasa ili kufahamu CCM ilivyojipanga kutoa sera kupiga vita rushwa, kuongeza fursa za ajira na kuendeleza jitihada za kudumisha amani na utulivu katika taifa.

 “Katika kipindi kama hiki ambacho vijana wamekuwa wakitumika katika mambo mbalimbali yanayolenga kubomoa au kujenga taifa, tunatoa rai kwa vijana kutokubali kutumika dhidi ya vitendo vinavyohatarisha afya na ustawi wa taifa letu,” alisema Shaka.

Alisema Ikulu ya Magogoni, Dar es Salaam na ya Mnazi Mmoja, Zanzibar hazitakuwa vichaka na mapango ya kuwaficha mafisadi waliofilisi taifa hili baada ya kuaminiwa, viongozi wenye uchu wa madaraka, waliokosa maarifa na uoni wa kisiasa.