JIJI la Arusha limekumbwa na taharuki baada ya kuibuka kwa matukio ya wanawake wanaoendesha magari kuvamiwa na kupigwa risasi na watu wasiofahamika ambao hutoweka bila kuchukua chochote.
Aidha, Jeshi la Polisi linaangalia uwezekano wa kufunga kamera ili kukabiliana na matukio ya uhalifu yanayolikumba Jiji, na kwa sasa wanaendelea na majadiliano na wadau mbalimbali ili kufanikisha hilo.
Kamanda wa Polisi mkoani hapa, Liberatus Sabas, jana alithibitisha kutokea kwa matukio hayo, aliyosema kuwa mawili yametokea eneo la Sakina kwa Iddi na moja Mbauda, ingawa hakuwa tayari kutaja jina la mwanamke huyo aliyedai kuwa alipigwa risasi lakini haikumpata.
Alisema hadi sasa hawajajua sababu ya matukio hayo, ambayo walengwa wakuu wamekuwa ni wanawake wanaoendesha magari, hivyo akaomba jamii kutoa taarifa zitakazowezesha kukamatwa kwa wahalifu hao.
Sabas, alimtaja aliyefariki kuwa ni Shamim Yulu, (30), ambaye alipigwa risasi shingoni juzi majira ya saa 3.30 usiku wakati akikaribia kufika kwenye lango la nyumba yake maeneo ya Sakina kwa Iddi wakati akiendesha gari yake yenye namba za usajili T 566 BYA aina ya Toyota Ipsun.
“Akiwa peke yake, alipokaribia geti la nyumbani kwake ghafla aliona pikipiki ambayo namba zake za usajili zilikuwa zimetolewa ikiwa na vijana wawili, ambao walimsimamisha na kufyatua risasi moja hewani…
“Kitendo kilichomfanya marehemu kuongeza kasi ya gari lakini majambazi hao walifanikiwa kumjeruhi na kumpora simu mbili aina ya nokia na Samsung,” alisema Sabas na kuongeza marehemu alifariki dunia wakati akipatiwa matibabu kwenye hospitali ya Selian.
Kamanda Sabas, alisema tukio lingine lilitokea mwanzoni mwa wiki eneo hilo hilo la kwa Iddi, ambako majira ya saa 1:00 usiku, Florah Porokwa alipigwa risasi kifuani wakati akiendesha gari lake aina ya Toyota Harrier.
Alisema wakati mwanamke huyo akielekea nyumbani kwake, alivamiwa na watu wawili waliyokuwa kwenye bodaboda na kumpiga risasi lakini alijitahidi kuendesha gari hilo mpaka karibu na nyumbani kwake, ambako alipoteza fahamu kutokana na kutokwa na damu nyingi kabla ya majirani kumsaidia kumwahisha hospitali.
Mume wa Florah, Edward Porokwa ambaye ni mkurugenzi wa Shirika liliso la kiserikali la kutetea haki za wafugaji, (Pingo’s), aliiambia Tanzania Daima jana kuwa, mke wake anaendelea vizuri ingawa bado amelazwa kwenye hospitali ya Selian.
Katika tukio jingine, Jeshi la Polisi linawashikilia watu wanne kuhusiana na matukio ya kigaidi, ambako mmoja kati yao, Adam Pakasi, (34), amekutwa na bunduki ya kutengeneza kienyeji, risasi 38 za short gun, ganda moja la risasi lililotumika pamoja na mafuta ya kusafishia bunduki yaliyokuwa yamewekwa kwenye chupa ya maji ya kunywa.
Kamanda Sabas, ambaye hakuwa tayari kutaja majina ya watu wengine watatu wanaowashikilia kwa madai kuwa bado wanaendelea kuwahoji, alisema walifanikiwa kuvipata vitu hivyo baada ya kupekuwa nyumbani kwa Pakasi
No comments:
Post a Comment