UNADHANI NINI KIMEPELEKEA MSICHANA HUYU KUFANYA KAZI YA BAAMEDI NA MTOTO?

Halima Jumanne (20) akiwa na mwanaye mzigoni katika baa moja (jina limehifadhiwa) iliyopo Buza Kanisani jijini Dar.MSICHANA aliyejitambulisha kwa jina la Halima Jumanne (20) amejikuta akiuza baa huku akiwa na mtoto wa mwaka mmoja na nusu ubavuni kisa kikidaiwa hali ngumu ya maisha.Tukio hilo la kushangaza lilijiri Juni 2, mwaka huu kwenye baa moja (jina kapuni) iliyopo Buza Kanisani jijini Dar na kunaswa na Opareseheni Fichua Maovu ‘OFM’ ya Global Publishers.

Awali ilidaiwa kuwa msichana huyo alifika kwenye baa hiyo akiomba kazi ya ubaamedi huku akiwa amembeba mtoto wake huyo.

Huku akiwa amebeba mtoto, Halima akiwa kaunta kuchukua kinywaji alichoagizwa na moja ya wateja katika baa hiyo

Kwa mujibu wa meneja wa baa hiyo aliyeomba hifadhi ya jina lake, pamoja na kumpokea mwanamke huyo aliyeonekana kuelemewa na msongo wa mawazo, alimshauri aachane na  ubaamedi na kutafuta kazi nyingine zinazoweza kumuingizia kipato kama vile za ndani ambapo msichana huyo alijibu yupo tayari ikiwa atapata.

Halima akipeleka kinywaji kwa mteja.

Waandishi wetu walipopata taarifa ya kuwepo kwa baamedi huyo, walifika kwenye baa hiyo na kumshuhudia msichana huyo akihudumia wateja na mtoto huyo akiwa ananing’inia ubavuni.
Akizungumza na OFM, Halima alisema yeye ni mwenyeji wa Kigoma na aliingia jijini Dar kutokana na matatizo mengi yaliyopo huko ikiwa ni pamoja na kufariki dunia kwa mama yake ambaye alikuwa akimtegemea kwa kila kitu.

Halima alisema, Dar alifikia Kongowe, Temeke kwa mwanaume aliyemtaja kwa jina la Michael na ndiye aliyezaa naye mtoto huyo.

...Akimuweka mwanaye chini kabla ya kumuhudumia mteja (hayupo pichani).

“Kwa kadiri siku zilivyozidi kusonga mbele yule mwanaume alibadilika tabia na kuanza kunipiga kutwa kucha bila kunipa hela ya matumizi.

“Ilifika hatua nikawa nakwenda kubeba mchanga kutoka bonde la Mto Mzinga na kuuza ili nipate hela ya kununulia chakula, hapo ni siku saba tu tangu nijifungue.

“Kutokana na mateso hayo, nilimtafuta kaka yangu ambaye alinichukua na kuishi kwake Buza ambapo huko nako niliishi kwa kuambulia kipigo mfululizo kutoka kwa wifi yangu.
“Nilimwambia kaka kuhusiana na mateso hayo lakini alishindwa kusuluhisha jambo lililonifanya kulifikisha suala hilo kwenye serikali ya mtaa.

...Akitoa huduma.

“Viongozi wa mtaa waliamua kunipa   hifadhi ya malazi kwenye nyumba ya mjumbe mmoja wa mtaa huku kesi  ikiendelea kusikilizwa,” alisema Halima.

Huku akionesha makovu na uvimbe jichoni yaliyotokana na kipigo, msichana huyo alisema kutokana na hali ya maisha kuwa magumu aliamua kufanya kazi ya u-mama ntilie wa kuuza chipsi mpaka usiku wa manane akiwa na mwanaye mgongoni.

“Kaka zangu sijui nifanyeje? Sina msaada wowote ndiyo maana niliamua kuja hapa baa nifanye kazi za hapa angalau nipate hela ya kula na mwanangu. Wamenishauri nitafute kazi nyingine, lakini mimi sijasoma, naomba kama kuna mtu anisaidie nipate kazi nitafanya vizuri tu,” aliomba  Halima.

Kwa yeyote ambaye ameguswa na kutaka kumsaidia msichana huyu kwa hali na mali, anaombwa awasiliane na mtu wa karibu wa msichana huyo kupitia namba za simu 0652 006 910