TAIFA STARS YA MART NOOIJ INAWEZA KUWATUNGUA BLACK MAMBAS TAIFA….

Thomas Emmanuel Ulimwengu yuko fiti kuwaua Mambas kesho.

WASWAHILI wana msemo maarufu usemao`Utavuna ulichopanda`. Kama ulipanda kokoto utavuna kokoto, usitarajie kuvuna mahindi.

Kwa muda mrefu sasa, timu ya Taifa ya Tanzania, Taifa Stars imekuwa ikijiandaa kucheza mechi ya kwanza ya kuwania kufuzu hatua ya makundi kusaka tiketi ya kucheza fainali za AFCON mwakani nchini Mrocco dhidi ya timu ya Taifa ya Msumbiji `Black Mambas`.

Mechi hiyo muhimu itachezwa kesho katika dimba la Taifa,  jijini Dar es salaam ambapo Stars watahitaji kupata ushindi mkubwa ili kujiweka mazingira mazuri ya kusonga mbele kabla ya mchezo wa marudiano utakaopigwa wiki mbili zijazo mjini Maputo nchini Msumbiji.

Stars iliweka kambi ya wiki mbili nchini Botswana kwa lengo la kujiweka sawa na wakiwa huko walicheza mechi za majaribio ikiwemo ile waliyofungwa mabao 4-2 dhidi ya timu ya Taifa ya nchi hiyo.

Baadaye ilirejea nchini na kwenda kuweka kambi nyingine mjini Tukuyu, mkoani Mbeya na sasa timu ipo tayari kuivaa Mambas .

Safari hii Taifa Stars imeonekana kuwa na maandalizi mazuri chini ya kocha Mart Nooij. Kwa haraka haraka, unaweza kusema pengine inaweza kufanya makubwa na kuvuna walichopanda kwenye kambi mbili za nje na ndani ya nchi.

Nooij amewahi kuwa kocha wa timu ya Taifa ya Msumbiji na aliifunga  1-0 Taifa Stars mwaka 2007 katika dimba la Taifa kuwania kucheza fainali za mataifa ya Afrika, mwaka 2008 nchini Ghana.

Na Baraka Mpenja, Dar es salaam

0712461976